DALMATINSKA KUŽINA Pivac u vinu

Osnovni uvjeti:

domaći pivac, kapula
crvena paprika, luk, juha
majčina dušica, crno vino
ruzmarin, peperončino
pasata ol pomidora, prošek
maslinovo uje, papar

Jedino ča se ol pivca baci jesu nojti, glava i ona trokutasta guzica! Prsi ćedu se pohat, tilo, vrat, nogice i vrhovi krilac gredu u juhu, a za pivca u vinu, ilitiga 'pijanega pivca', tribadu nan batci, karabatci i krila.

E sad, napodan teće, na maslinoven uju, vaja popeć komade pivca sa svih stran. Ondac se meso izvadi i na to isto uje doda se kapula iskrižana na polumisece. Posolit ćemo kapulu, a na kraju šufigavanja dodat ćemo na listiće izrizan i luk. Do minuta pivca triba vratit 'rastavjenega na djelove' u teću, ter ga zasut na prutiće iskrižanon slalkon crvenon paprikon, mlivenin crnin papron, a lipo bi bilo metnut i kigod peperončino oli juti feferon. Zalit vaja to sa crnin vinon i prošekon, pasaton ol pomidora, pa posut suhin i, meju prstiman izmlivenin, ruzmarinon i majčinon dušicon. 

Dobro ćemo naložit oganj, a kal se sve uzglogoji smanjit ćemo forcu napolak. I pustit uru vrimena da tihula. 

Obišno, kal se kuha pivac u vinu, kuha se u drugen potu i juha ol pivca. S ton juhon moremo kašnje (kal se juha već učini, i kal se u teći s 'pijanin pivcon' reducira šug) podlivat matrejal ča je 'u alkoholiziranen stanju'. A podlivat ćemo pivca, dokle se juha ne učini, sa crnin vinon i prošekon.

Ovi šug ne vaja ako je puno ridak: boje je ako je, onako, gušći. Ondac je guštožiji. Već naprama ten kako ko voli, kašnje se meso more izvadit iz teće, pa ispasirat no sve ča je unutra u jednolišnu smjesu, a more se sve ostavit i nako.

Uz pivca u vinu odlišno gredu kuhani rezanci, makaruni oli njoci.