DALMATINSKA KUŽINA Pohovani obalni borićari

Osnovni uvjeti:

srića: 1. za nać je i 2. za ne ubrat krivu

dobar imunitet zbog vlage u gori

pečurve obalni borićari

suncokretovo uje

glalko brašno, jaja, sol

Od naših pečurav najboje je pohat ne žute, zovedu se obalni borićari. Važno ih je lipo očistit. A to ćemo učinit tako da ćemo lagano ogulit kožicu s gornje strane, pa ćemo dobit čistu pečurvu lipe svitlo žute boje i puno lipega vonja. Odizdali je svitlo žute boje, ko mladi limun, i doli je lipa spužvica ča se ne skalaje nožon. 

Sadar ćemo na plilken pijatu poredat očišćene pečurve, posolit jih s obe dvi bande, ter ćemo jih ostavit da se ispišadu. U njiman je puno vode, i već nakon par minutih ta se voda počme cidit. Nikad neće isteć sva voda, pa se posli po ure vrimena meju dlaniman izažme na voda ča je ostala u pečurvan. Tako izažete pečurve dobro ćemo umejat u glalko brašno, usupat u istučeno jaje su dva zrna soli, i uvalit u vrilo uje u pršuri. Sa svake strane pohat ćedu se pečurve jednu dvi-tri minute, već naprama ten kolike su i koliko jih jema. Gotove su kal jaje s obe dvi bande lipo požuti, a na mistiman kal budu kafene maće, ko no kal se friga jaje na mantalu.