DALMATINSKA KUŽINA Prisnac

Osnovni uvjeti:

Tisto: 
30 dek brašna, 2 zlice cukra
4 zlice masti, 1 jaje, voda
Smjesa:
30 dek mladega sira, 10 dek škorupa
2 jaja, kvarat cukra, 2 vanilije, izgratani limun
Premaz: 
mast, žumance

Slalko ol mladega sira, jošćec neposoljenega i ispečenega u tistu brez kvasa i brez soli, prisnac, nikada je bila delikatesa ča se je činila priko cile Dalmacije, a danas je to sačuvano jedino kolo Benkovca, u Bukovici i Ravnin Kotariman naviše Šibenika i Zadra.

Za učinit pravi prisnac najprvo vaja u terini pomišat brašno, cukar, mast i jedno jaje, pa ol tega rukan izmisit tisto. Vode ćemo dodat napodan žmula, malo po malo, koko bude pitalo. Dobiveno tisto lazanjuron ćemo stanjat natanko, tako da ga dovedemo u krug, a ondac ćemo rastanjano tisto pripomistit u namašćani obal kalup i pinkicu ga posut brašnon. Tisto vada obilato prihita priko stranic kalupa, tako da ga kašnje moremo zavrnut nase priko smjese.

E, a smjesu ćemo učinit tako da ćemo u terini najprvo žicon istuć dva jaja sa kvarat cukra i dvi vanilije. Pokle smo jaja dobro žbatili, izgratat ćemo u njih i koru ol jednega manjega limuna, pa ćemo u to sve dodat mladega sira, istrvjenega meju prstiman ako je baš mlad, oli ćemo ga izgratat na gratakažu ako se je jurve bokun stvrdnu. Uvalit ćemo u to i škorupa, ter ćemo sve dobro izburtit drvenjačon. Ondac ćemo to iskrenut u kalup imbazdan tiston, a višak tista zavrnut ćemo nase, tako da u sridi smjesa ostane otvorena, nepokrivena. Jedno žumance istuć ćemo perunon, pa ćemo pomazat kolač da u pečanji dobije lipu boju i vonj. Peć ćemo prisnac tri kvarta od ure u špaheru na 190 stupnjev, a najboje bi ga bilo ispeć u kominu ispol peke. Riže se u trokute, kako piceta.