DALMATINSKA KUŽINA Punjene paprike
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
paprike, mliveno meso
rizi, luk, petrusimul
pančeta, sol, papar
maslinovo uje, brašno
slalka crvena paprika, konšerva
Omar na počelu vaja jemat na pameti je se gredu radit punjene paprike, oli ćedu se činit domaće bombe! Govorin ovo iz vlastitega iskustva, i ne zafrkajen se! Kal san prvi put želi učinit punjene paprike, ondac san jih bi dobro nabi, ka kuburu, tako da kal su bile gotove vajalo je vazest motornu pilu oli kosor za razrizat jih…
Evo vako vaja učinit.
Mliveno meso metnuli smo u jednu terinu. U to ćemo sal dodat usitno iskrižani luk, petrusimul i komadiće pančete. Ma stvarno usitno! Iskrenut ćemo bokun soli i papra, a ondac dodat i dvi ćikare rizih, već naprama ten koko je mesa. A dosta je jednu po kila. Va se smjesa dobro rukon izmiša kroz prste. Ondac se očistidu paprike na način da se kružno nožon otvori njezin grćan, namo di je šćingal s kin se držala za stablić. Izvadi se sime vanka i ubaci dil smjese ča smo je rukan ispaštroćali u non terini ol malopri. Razlika meju punjenin paprikan i domaćin bomban u ten je da ćemo za lipe punjene paprike ostavit jednu prst ipo praznega prostora pri ušću ol paprike: da se, kal se rizi budedu kuhale, jemadu di širit ilitiga razbumbat. Ako ste sirove paprike napunili do vrha, ondac posli kuhanja morete komodno komugod, ča van je čagod dužan, lipo razbit glavu!
Pokle smo nadili paprike, u široku teću ćemo ulit maslinovega uja i na njemu zažutit brašno. U to se dodadu paprike i bokun popečedu pazeć da ne izgori brašno. Ondac se doda pinku vode, konšerve i slalke crvene paprike, a sa strane se doda na manje komadiće iskrižana pančeta, već naprama ten kakovi su van šekondi gušti. Uspe se soli i papra, pa se ostavi kuhat nalagahno jednu uru, uru i kvarat, s nakrivjenin pokrivon na teći.
Uza punjene paprike ne gre ništa tako dobro ka ča gre pire ol kumpirih.
P. S. Da bi ona smjesa s kojon se nadiju paprike bila ča rahlija, tobože mekja, more se u nju dodat i bokun kore ol kruha namočene u vodu i isciđene kroz prste.
