DALMATINSKA KUŽINA Rizi na kvasinu
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
kapula (jutika), luk, voda
rizi, kvasina, sol, konšerva
maslinovo uje, petrusimul
U teći se zažuti na koskice iskrižana kapula oli jutika, dodadu luk, petrusimul i konšerva. Kad dojde vrime da kapula, oli jutika, samo ča ni gotova, prospe se i na zlici soli. Ondac se ulije po žmula kvasine, uspedu dvi ćikare rizih i malo vode. Miša se brez fermavanja doklegod se rizi ne iskuhadu, ča hoće reć jedan obilati kvarat od ure. Kako se spiza šuši za vrime kuhanje, pa se rizi počmedu lipit, dodaje se teple vode da nan rižot ne zagori.
Pokle je sve gotovo, najboje bi bilo sadržaj izlit na plilki pijat i ostavit da ostine. Hladne rizi na kvasinu su najboje, i najukusnije. Dobro bi bilo, kal spiza dojde na 'sobnu temperaturu', temperamenat kamare, stavit pijat u frižider, da jošćec višje ostine. E, to je ondac delikatesa za koju nis skroz sigur, je glavno jelo, oli desert…!?
