DALMATINSKA KUŽINA Srdele na savuret

Osnovni uvjeti:

srdele, sol, papar, brašno

maslinovo uje, sojino uje

kvasina, bilo vino, luk

ruzmarin, petrusimul, javor

Friške srdele sa peškarije - moredu lustravice, a moredu i ne druge - očistit ćemo tako da ćemo nin ostrgat lustre, okinut glavu u vratu i izvadit drob. Pa ćemo jih lipo postivat na pijat sa strane.

Pokle smo sve srdele očistili, upalit ćemo pršuru sa sojinin (oli suncokretovin) ujen, i dobro ćemo jih umejat u glalko brašno. Kal se je uje ushihoćalo, lagahno ćemo slagat izbrašnjene srdele - ke smo bokun otresli, da olpade višak brašna š njih - i daje frigat na žeštoken ognju. Pokle je pasalo jednu dva-tri minuta (naprama ten koka je pecadura srdel), obrnut ćemo jih na drugu bandu, ter molat da se jošćec toko frigadu. Izvadit ćemo jih vanka i metnut na pijat sa karton, kako bi karta pospugala uje sa rib.

Tako ćemo isfrigat sve srdele, dokle se ne opremimo do kraja.

Ondac ćemo u drugu pršuru ulit maslinovega uja, neka ga bude, neka dobro oplivi lno, i u njemu nalagahno vaja šufigavat na koskice iskrižani luk i usitno izrizani petrusimul. Čin su pasala tri-četiri minuta, u to ćemo dodat dva lista javora, dvi-tri grančice taman uberenega ruzmarina, soli i papra, a ondac ćemo to sve zalit su bićerinon kvasine i žmulon bilega vina. I molat ćemo da učini tri-četiri glogoja, da se gušti prožmedu. 

Dokle se je u pršuri kuhalo vo zajno ča smo zdatali, isfrigane srdele su ostinule i lipo smo jih postivali u kakovu staklenu terinu. Pa ćemo jih ondac tako stivane i zbivene, ko parkete, oblit s ovin ča smo učinili u drugon pršuri i ostavit ćemo jih da se ohladidu. Kal se je ohladilo metnut ćemo u frižider, neka lipo ostine, i jist ćemo studeno sa kruhon. Vako parićane srdele moredu durat i šetemanu dan u frižideru.

P. S. Srdele na savuret moredu se učinit i od srdel ispečenih na gradelan, ča su ostale, ča jih nismo uspili izist.