DALMATINSKA KUŽINA Štrudel

Osnovni uvjeti: 

Tisto: 2 jaja, 2 zlice cukra
3 zlice raskravjene masti, rum, sol
suncokretovo uje, cukar u prahu

Nadjev: 8 jabuk, kanela
1 vanilija, 3 zlice cukra, 5-6 keksih

Kal se u Selciman, ali i u Dalmaciji, reče da se gre činit štrudel, ondac se zna da to hoće reć da se gre činit štrudel ol jabuk. Reče se samo – štrudel. Ako se ča drugo meće unutra, ondac je to druga pisma, pa se, pritpostavka, reče da se gre činit: 'štrudel ol višanj'. To smo rišili.

E, a za vi naš štrudel ćemo u jednu visoku terinu razbit dva jaja, posut jih su dvi zlice cukra i pinkicu soli, ter jih oblit su tri zlice raskravjene masti (ili soje) i čepon ruma. Pa ćemo ondac to dobro istuć s mikseron, dokle se sve lipo ne žbatije. Čin smo ocinili da je dobro, počet ćemo dodavat glalkega brašna, pomalo, stalno vrteć drvenjačon, vrteć ne pristajuć, i ne umorit se brašno dodavajuć, sve doklen ta malta ne dojde do prid tisto. A kal samo ča se ni ta malta deventala u tisto, iskrenut ćemo je na stol ča smo ga posuli brašnon, pa ćemo je daje misit rukan dodavajuć brašna koko pita. Pokle nan se je učinilo da je gotovo, fermat ćemo sa misenjen, pa ćemo ondac tu grudu tista podilit u dvi manje balotice, koda krafene, i molat ćemo jih da olpočinedu. Molat ćemo jih tako ča ćemo jih zamotat u krpu, pokrit s drugon krpon, pa trećon, pa najilonon, pa ondac još s kojongod krpon oli dekicon. Najilon se meće, fala Bogu, da se na zraku tisto ne počme šušit, pa da se po vrsiman ne počme ćapavat korica. Neka tako grudice oldahnedu barenko uru vrimena.

Za to vrime mi ćemo u miru izgratat jednu osan jabuk, sa koron, ma brez ne sride sa simenjen. Po izgratanin jabukan razasut ćemo cukra po žeji: stavmo, pritpostavka, tri vele zlice. Dodat ćemo i jednu vaniliju, kanele u prahu i pe-šest samlivenih keksih (oli prezle). Sve ćemo dobro zlicon izburtit i molat zbande da počije. 

Ura vrimena je pasala da tisto olpočije. Na stolu ćemo sadar rastrit jednu tavaju, ku vaja bokun posut brašnon. Tote ćemo lazanjuron jednu grudicu tista rastegnut, nastojeć da se razvuče u jednu velu kvadrelu, a ondac ćemo daje rukan rastezat koko budemo mogli, nakon čega ćemo je dignut na ruke, pa je na podlaktican pečit pomnjivo da ne pukne, da se ne ispare, ko kal Šiptar čini burek. Lipo smo rastegli tisto, pa ćemo ga jošćec lišje leć nase na tavaju.

Sadar ćemo po njemu prolit naprstak suncokretovega uja oli soje, pa ga lipo razmazat po cilen tistu. Razasut ćemo i začinjene izgratane jabuke, nako, da bude po prsta debjine. (Ko voli, more metnut i po šake orihov, grubo iskrižanih nožon.) S jednega kraja, malo po malo, pomnjivo, počet ćemo dizat tavaju, i š njon tako zamotavat vo tisto s jabukan u rolu, u štrudel. Đentilasto to vaja činit, da sve ispade kako spada. Zamotani štrudel pribacit ćemo u namašćanu lašćeru, pa ondac jopeta sve isponova, so non drugon grudicon tista.

Lašćeru sa štrudeliman uvalit ćemo u pećicu ol špahera stepljenu na 190 stupnjev temperamenta, di će se peć jednu po ure. Ako ne porozavi, bokun će se pojačat špaher i peć jošćec desetak minutih. 

Kad vidimo da je gotovo, ugasit će se špaher, otvorit vrata ol pećice u libar, i tako pustit štrudel da se uležaje. Neka stoji tako kvarat od ure, da se boje parića za temperamenat (sobni) ča je vanka pećice ol špahera. Poslin tega štrudel ćemo izvadit iz pećice, ostavit ga da skroz ostine, pa ćemo ga posut cukron u prahu.