DALMATINSKA KUŽINA Svaštafažol na Prvi maja

Fažol ilitiga grah ji se, po običaju, na Prvi maja. A kako je to i Praznik rada ča se fešteđaje svudir po svitu, ondac se u niman veliman kazaniman kuha 'vojniši grah', i dili ga se judiman po pijacan i trgoviman, parkoviman i nasadiman… Prosto ko pasulj! Zaral tega donit ćemo nikoliko vrstih spize ka se more parićat ol fažola. Ovo je ne štorija, vengo sinfonija obo - fažolu! Svaštafažol ilitiga maštafažol, jerbo smo jurve pisali ča je to - paštafažol!

Juta

Za skuhat jutu, kuhanja je sva ista ka i kal se gre parićavat paštafažol.

A prin vengo se gre parićat juta, valo bi proštudijat Ričnik selaškega govora, da se ne bi dogodila kakova 'gurmanska dežgracija'. Jerbo, juta je spiza ča se kuha ol kapuca i fažola, a juta je, bogatice, i ni matrejal ol kega se činidu vriće. I sad, pametan ste svit, pa ne triba brž rastresat obo ten ča bi se moglo dogodit kal bi se vrića stavila u teću s vodon!? A ako je pridjev, ondac ono juta znači da je ništo hitno, oli da se ne da proć brez tega. Pa se zato i reče da je ništo – juta potriba.

Dokle fažol prolazi pašijunske muke, vajalo bi šufigat kapuc. Zato vaja na masti (i bokun maslinovega uja) pinkicu zažutit na fetice iskrižanega luka, a ondac dodat kapuc i posut, prama žeji, su pinku slalke crvene paprike. Ulije se i u žmulu vode, pa se po ure sve to lipo šufigaje pazeć da ne zagori. Kal je gotovo uspe se u teću sa fažolon, i mola da učini dva glogoja.

Normalno, ništa brez zafrige… nećemo nijanci govorit…!

Fažol sa orzon

Za skuhat fažol s orzon, kuhanja je sva ista ka i kal se gre parićavat paštafažol. Kogod moči svu noć orzo u vodi, da smekša, a kogod, većina, to ne čini. Vengo, kad metne kuhat fažol, metne u isto vrime kuhat i orzo.

Kogod orzo kuha nastranu u jobičnon vodi (navlaš ondac ako se je orzo močilo u vodi po noći), ma to ni dobro, jerbo kal se kuha u juhi od fažola, ondac orzo lipo upije u se gušt glavnega gušta: gušt fažola. Nomalno, more se orzo metnut i na po puta kuhanja fažola, ma se ondac rišća da, ako se krivo procini vrime, da fažol oli orzo budedu prikuhani, odnosno tvrdi. 

Normalno, ništa brez zafrige… nećemo nijanci govorit…!

Fažol s kumpiriman

Za skuhat fažol s kumpiriman, kuhanja je sva ista ka i kal se parićaje paštafažol. Sve do ne faze kal se jema metnut paštu… Znači, vaja omirit kal fali fažolu jošćec jednu kvarat od ure da se iskuha, pa ćemo u nje usut na fetice iskrižane kumpire. Neka fetice kumpira budu iskrižane u obliku slova D. E, kojugod ćemo feticu narizat na puno sitne komadiće, kako bidu se oni u kuhanji skroz naskroz raspali, pa nan fažol učinili bokun gušćin, punijin.

Normalno, ništa brez zafrige… nećemo nijanci govorit…!

Pulenta sa fažolon

Za ovu štoriju najvažnije nan je da jemamo u frižideru skuhanega fažola, na primjer, ol jučer. Oli prikučer.

Sve drugo je - pisma! Normalno, pulenta se kuha tako, vidili smo već, da se u vrilu posoljenu vodu pomalo usipje pulenta, stalno mišajuć da se ne stvoridu gropi, a ulit će se i pinkicu maslinovega uja, da se manje lipi i da se boje sažme sve to skupa. 

Posli jednu dva-tri minuta, kal je pulenta deboto gotova, dodat ćemo u nje zrna kuhanega fažola, bokun promišat i izlit na pijat pusteć da se ohladi. Pulenta sa fažolon ji se kal ostine.

Fažol na kvasinu

Fažol na kvasinu je spiza ča spada u, rekla bi moja pokojna nona Zorka, 'kolateralne žrtve'…! To hoće reć da se fažol na kvasinu ne kuha tako da se kuha fažol na kvasinu, vengo se, odrebata, ova spiza čini ol fažola ča je već skuhan, pa je stavjen u frižider za sutra, prikosutra, oli za prikoprikosutra… 

Obišno se fažol kuha u kakovon velon teći, bronzinu oli u kotlenki, pa tega fažola bude. Kal je gotov, jedan dil se odvoji, i u nje se doda toliko spominjana zafriga, a oni drugi dil, ča ostane, stavi se u frižider brez zafrige.

E, tot smo! Ovi fažol iz frižidera, brez zafrige, potriban nan je za ovo obo čen je vode govora. Skuhani fažol ča stoji u frižideru, to je, ustvari, nika vrsta juhe ol fažola. Kutlon ćemo u duboki pijat izvadit koliko nan triba, pa ćemo u to dodat jošćec pinku papra i soli, maslinovega uja i kvasine, koda smo – eto Bože! – išli začinjat salatu.

Vaki fažol je puno lip kal je studen, baš kal je iz frižidera, i dobro dojde čoviku i za okripit se, ma, Boga mi dragega, i za rasfriškat se.

Fažol na salatu

Studeni skuhani fažol ol jučer, oli ol danas, odvojit ćemo iz teće u kon nismo usuli zafrigu. (Fažol su naši stari kuhali u velen bronzinu, oli u kotlenki od nikoliko litar. Pa bidu ondac skuhani fažol s meson odvojili u manji sud i u njemu, za ti obrok, skuhali paštafažol oli fažol s kumpiron. I u to dodali zafrigu. Ono rešto ostane za u frižider, navarno, brez zafrige.)

Fažol brez zafrige, s malo njegove juhe, odvoji se u terinu. U nje se iskriža jedna kapula na polumisece, posoli se malo, popapri i začini sa maslinovin ujen i kvasinon. Famozna salata.