DALMATINSKA KUŽINA Tingul ol kokoše
'Maestrochef' Siniša Vuković piše o tradicionalnoj dalmatinskoj spizi
Osnovni uvjeti:
batci i karabatci ol kokoše
maslinovo uje, bilo vino
kapula, luk, sol, papar, juha
koren selena i petrusimula
mrkva, peperončino, prošek
slalka mlivena paprika, ruzmarin
pelate ol pomidorih, mravinac
Za učinit dobar tingul ol kokoše uzest ćemo njezine batke i karabatke. More se metnut i prsijuh, neće smetat. Pa ćemo te komade na naglo isfrigat na žeštoken maslinoven uju s obe dvi bande. Izvadit ćemo meso i metnut ga zbande.
Na iston masnoći šufigat ćemo iskrižanu kapulu, kojon ćemo pri kraju dodat iskrižanih dva-tri češja luka, ter izgratanu mrkvu i korene selena i petrusimula. Pa se to žuti dokle ne ižvampije voda ča je pusti korenje.
Zalit ćemo sada su bilin vinon, a dodat ćemo i pelate ol pomidorih, na kućarinu slalke mlivene paprike, jedan peperončino, malo mravinca, dvi-tri grančice ruzmarina i posložit ćemo komade kokoše u to. Ako fali tekućine, dolit ćemo malo juhe ol kokoše i pustit da se kuha na sridnje jaken ognju. S vrimena na vrime obrnut ćemo komade kokoše, a kako bude falilo šuga dolivat ćemo prošek i juhu. Uru vrimena kuhanje i - gotovo.
