DALMATINSKA KUŽINA Tripice ol kokoš i pivac

Osnovni uvjeti:
drobi ol kokoš i pivac
kapula, luk, petrusimul, sol
pančeta, pršut, bilo vino, prošek, kumpir
maslinovo uje, juha ol pivca, peperončino
slalka mlivena paprika, konšerva, lišće javora

Kal god je govorancije obo žigerican i intrameniman, vavik su posridi nikakove pridrasude. Ma, vaja jemat kuraja, a vada čejade bude bokun i stentano i bogustvoreno, pa se more domislit jedne vake ricete, inspirirane onin klasičnin – oli baroknin, nima nikakove veze – tripican ča jih užamo kuhat ol drobih juncih, ol drobih jancih. Vode, tripice iskuhat ćemo ol drobih ol kokoš i pivac.

Najprvo, drobe ćemo prisić s jedne bande i raširit jih kako duplericu u fojiman. Dobro ćemo jih isprat pod vodu, pa, buduć da jema tote kvartu masnoće, nožon ćemo maknut ća veći dil tega sala, ma ćemo isto ostavit bokun tega larda da dâ gušta i da dâ gustoće. E, a kako je to puno masno, vaja vodit računa i obo ten da maslinovega uja ne prilijemo previše u teću, na ken ćemo šufigat na koskice iskrižanu kapulu. Posolit ćemo je i molat da daje ča boje svehne, pa ćemo butat u to i pančetu isto tako iskrižanu na koskice. Zato vaja jemat mire u masnoći, jerbo je vo sve masno, a va bit atento i sa soljon, jerbo su i pančeta i pršut slani, pa da nan posli tripice ne budedu priko više posoljene. Na svehnutu kapulu iskrenuli smo koskice ol pančete, pa samo minut potla tega dodali usitno iskrižani luk i petrusimul.

Čin smo čuli u zraku da vonja luk, a petrusimul se uspuca ka mitraljez, iskrenut ćemo u to drobe ol kokoš i pivac ča smo jih prin tega po visini iskrižali na uske prutiće, baš ko tripice ol junca oli janca. I tako ćemo jih skupa šufigavat kvarat od ure, doklen se ne ispišadu pa ta voda ižvampije. Čin se je to počelo lipit, teću ćemo oblit sa bilin vinon, noliko, da dobro oplivi. Uvalit ćemo u to i komade pršuta, no mesa ča je bilo uza kost, i ča smo ga prin tega potopili u vodu (ako je posridi cila kost, ondac na vada prinoći u vodi). Poklopit ćemo teću i molat da tihula daje nalagahno, stalno je oblivajuć juhon ol pivca. Poslin jednu uru vrimena metnut ćemo na zlici slalke mlivene paprike i dva-tri peperončina, pa molat da tuntenja daje, isto ispotiha.

Žilavi su vi drobi, nismo jih obarili prin tega ka ča je običaj sa drobiman ol junca oli janca, jerbo ni potriba, ne smrdidu, pa se hoće pinku dužje da se kuhadu. A ondac, recmo poslin uru i kvarat oli uru ipo vrimena kuhanje, uvalit ćemo i kumpire iskrižane na komade ko za gulaš, ter pustit da jošćec daje piruca, oblivajuć juhon. Do minuta uvalit ćemo i na zlici konšerve i metnut kigod list javora. Neka daje kuha pomalo ko do sada, pa kada je kumpir gotov, gotove su i tripice ol kokoš i pivac.