DALMATINSKA KUŽINA: Kunac na savuret

Kunac je jedna puno mirna beštija ka bi se mogla držat i u kući. Ne govori, ne bleje, ne mrnje… samo ji. Ne vaja mu davat pit vodu da se ne naduje, ol čega bi moga krepat. Vodu prima priko zelene trave. Voli mekine, frementun, kumpirovinu, koru ol voća… Kako svak nema živega kunca u tapuneri, obišno ga se drži zaklanega u duboken. Večer prin se izvadi iz skrinje, da led olpusti. 

A ondac se u široku teću metne kunac i oblije crnin vinon. U marinadu se metne četiri-pet nožic luka, desetak kuglic papra u zrnu, tri lista javora i dvi grančice ruzmarina. Tako neka kunac stoji zatopjen tri-četiri ure.

Kal ga se izvadi, ocidi ga se i dobro istre kuhinjskon krpon. Posoli ga se sa svih stran i ostavi po ure na bandu da sol boje ujde u meso. Ondac ga se stavi u lašćeru sa vrilin ujen ol soje oli đirasola pomišanega sa mašćon, a kraj njega dvi kapule u komadu i dvi mrkve, more i malo ruzmarina. (Kako ko voli, more ga se i špikovat sa slaninon, lukon i mrkvon i metnut malo da se moči u razblaženon kvasini oli u crnen vinu.) Stavi se uza kunca jošćec pinkicu pančete izrizane na listiće i dvi-tri nožice luka. Dokle se kunac u ten sven peče, lagahno ga se svaku toko polije razvodnjenon kvasinon, pa on boje pusti šug. Duranje pečenja je kolo uru i kvarat na 230 gradih temperamenta, a more se peć i na jošćec žešće. Važno je da se on peče najako, kako bi mu se kora boje zahrustulala, i kako bi šug posli bi jošćec boji. A polivanje s kvasinon pomoć će nan da kunac ne izgori. Normalno, oblivat ćemo ga i sa sokon u kojen se peče. Kal je kunac jednu kvarat od ure u peći, vaja ga obrnut na drugu bandu, da se ne zalipi (pa se to ponovi nikoliko putih svo to vrime), a kal je deboto pečen, izvadi ga se vanka i iskida na komade. Ondac ga se stavi u jednu veću teću i po njemu procidi ni šug u kojen se je peka u peći. 

Dokle je kunac provodi zajne momente u pečenju, vaja na kašunić metnut jedan dubji pijatić u kojen se izgratadu dva-tri češja luka. Na to se dolije po čaše maslinovega uja i kapne malo soka ol limuna. Smjesa se vrti zlicon u jelnen smjeru – ka no kal se čini majoneza – pa kal je kunac iskrižan na komade i stavjen u teću, ovin ga se šugon sad oblije. Omar se teća stavi na špaher, na žeštoko, da naglo provre i tako odkuha kolo pet minutih, nakon čega se oganj smanji. Ondac se ulije malo bilega vina i nikoliko koskic cukra (more se metnut i crno vino, kako ko hoće), četiri-pet paprih u zrnu, nalije se vodon da meso oplivi i tako se kuha nalagahno dokle meso ne smekša (kolo po ure). Prama žeji, more se jošćec usut i iskrižanega petrusimula.

Prin samega kraja, iz teće vaja izvadit komade kunca, pa no sve ča je u teći propasirat ćemo u jedan lipi, gusti i guštožni šug. Vratit ćemo komade mesa i pustit da jošćec malo sve to lipo skupa kuha.

Kunac na savuret more se jist sam za se, a moredu se šugon polit njoci, manistra oli pulenta.