Lepeze svetega Jakova u tri ricete

Lepeze svetega Jakova zapečene

Vo je, brž, najlišja škojka ča se more ćapat u Jadranu. I, skupa s prstacon, najukusnija. Za nikoga su lepeze, za nikoga kapice svetega Jakova, a najširja njihova kazata je - 'san žak'. Prin vengo ča jih se jema voju parićavat važno je da su lepeze - žive! To će reć: zatvorene. Ako su otvorene, i nećedu zaklopit ne svoje 'stranice' kad jih se stišće, to hoće reć da su škojke krepale. Pa ćemo take bacit ća.

Žive škojke najprvo vaja proprat pod vodu, bruškinon trličajuć š njih jarinu ča se ćapala u nin utoriman, ka i svu nu drugu šporkicu. Pokle smo jih sve proprali, ondac ćemo jih postivat u kakovu teću, ulit u bićerinu vode (oli po žmula, već naprama ten koko jemamo lepezih i kolike su), pa ćemo jih metnut na oganj, da se na pari otvoridu. Čin se otvoridu, vadidu se vanka, a ne škojke ča se ne otvoridu, krepane su, i tukalo bi jih bacit u smeće.

Škojkan, ča su se raspečile, oldilit ćemo gornju ol dojne polovice jušture, pa ćemo s kakovin nožićen oli šćileton kargat meso. Meju prstiman maknut ćemo ća ne kafene branče i ni crni brabak ča se zove 'papar', a ondac ćemo u nu dubju polovicu škojke vratit bilo meso i nu narančastu koda butargu. Posut ćemo to s po kućarina iskrižanega luka i isto toko petrusimula, kronut dvi-tri kapje maslinovega uja, ter ćemo razasut meju prstiman bokun papra. Ondac ćemo po sven ten iskrenut malo izgratanega parmezana, oli kega drugega tvrdega sira, i lašćeru sa lepezan uvalit ćemo u dobro raškaldanu pećicu ol špahera. Je pasalo jednu kvarat od ure, oli manje, kal se sir raskravi i škojke zacmaridu - moredu se jist!

Lepeze svetega Jakova sa kongan

Za vu ricetu sa lepezan svetega Jakova vaja učinit sve isto ka i u riceti prin, sve do nega mista kal se škojke očišćene vratidu u nu dubju polovicu jušture. Bilo meso i narančasta butarga.

E, samo ćemo sadar bili mišić iskrižat na koskice, oli na ploškice, a narančasti polumisec ćemo pririzat popoli. Očišćene repe ol kongih isto ćemo iskrižat na dva ili tri dila, naprama ten kolike su, pa ćemo svo to meso izburtit najprvo izmeju sebe, a ondac i skupa sa iskrižanin lukon i petrusimulon. Posut ćemo i s pinkicu mlivenega papra i izmrvjenega mravinca, poškropit s pinkicu maslinovega uja i so ton smjeson ćemo lipo napunit škojke. Priko svega ćemo ugrezo izgratat mekega sira gaude, pazeć da kad se raskravi ne gre priko škojke. 

U vrilon pećici ol špahera neka se lepeze pečedu na žeštoko dokle se sir ne raskravi i ne ćapa nu lipu žuto-kafenu koricu. 

Lepeze svetega Jakova sa pečurvan

I za vu ricetu sa lepezan svetega Jakova vaja učinit sve isto ka i u ricetan prin, sve do nega mista kal se škojke očišćene vratidu u nu dubju polovicu jušture. Bilo meso i narančasta butarga.

Pa ćemo narizat meso od lepezih na koskice i butargu popoli, a, da bismo jemali malo višje morskega okusa, dodat ćemo i kigod iskrižani repić ol kongih. Na maslinoven uju sadar ćemo pofrigat na komadiće iskrižane pečurve (šampinjone oli ke druge, bukovače), pa ćemo ondac te pečurve dodat škojkan i kongan. Posut ćemo jih su pinkicu papra, izmrvjenega mravinca, luka i petrusimula, pa dobro vaja sve to izburtit. Kronut ćemo i kap maslinovega uja, ter sve odizgari zasut izgratanin siron gaudon.

Lašćeru sa postivanin škojkan uvalit ćemo u vrilu pećicu ol špahera, raspalit na najžešće, pa peć dokle se sir ne raskravi i lipo se ne zazlati.