Pinetada ol patke sa višnjan i medon

Najprvo vaja dobro proprat patku pod vodu, pa je ondac rasić na komade, prama pozicijan mesa, po zanatu. Već naprama ten kolika je patka, iskrižat ćemo kapule na koskice (na dva kila patke, recmo, doć ćedu dvi velike kapule, a brž i višje). 

Kapulu vaja šufigat na pačjon masti, a ako nema nje, normalno, duperat ćemo maslinovo uje. Je kapula svehla, dodat ćemo dva-tri usitno iskrižana češja luka i u šaki pančete narizane na koskice ko kapula. Čin se je pančeta zacaklila, a luk zavonja skupa sa pančeton, uvalit ćemo u teću komade narizane patke, dobro posoljene. Neka se to dobro šufiga, popeče sa svih stran. Ondac ćemo meso oblit dobrin žmulon vina, dodat dvi grančice rusmarina, dva-tri lista javora, malo papra i šest-sedan klinčićih u komadu. Zalit ćemo i sa pinku vode, da meso oplivi. Neka to tako tihula kvarat od ure.

Je toko vrimena pasalo, uza to ča smo kad i kad drvenjačon sve ispromišali, u teću ćemo sadar iskrenut u terinici višanj iz rakije (ako nemate njih, moredu i ne kupovne iz kompota), usut ćemo i kvarat meda ol kaduje, ter dolit jošćec bokun crnega vina, koko bude pitalo. 

Pustit ćemo to da daje piruca nalagahno, uru vrimena do uru i kvarat, u teći na kon je pokriv jedva otvoren da puno ne izavire voda. Pokle se je šug ugusti, lipo nako škur ol vina i višanj, š njin ćemo oblit iskuhane pinete, a ako vas je voja morete i njoke oli makarune, špagete oli lazanje.