DALMATINSKA KUŽINA: Blušći i sparoge
Dalmatinska kužina Piše: Siniša Vuković

DALMATINSKA KUŽINA: Blušći i sparoge

'Maestrochef' Siniša Vuković piše o tradicionalnoj dalmatinskoj spizi

Osnovni uvjeti:

ne bojat se guj, slobodno vrime
znat di su pošte, blušći, sparoge
maslinovo uje, sol, papar
voda, kvasina, jaja utvrdo

Ko ditetu vavik mi je bi gušt poć 'u blušće'. S nonoton, normalno. Isprva, puno mi je bilo dražje poć jih išćat i brat, vengo jist, jerbo su mi bili puno gorki. Danas je situacija bitno drugačija, budući da jih mogu izist – kvintal!

U von štoriji obo blušćiman i sparogan puno je važno znat di su pošte, di su mista na kojiman ćeš jih nać. Obišno su to vavik ista mista, na kojiman oni izrestedu, pa ni baš pametno hodit jih išćat napamet. A osobito je blesavo hodit puten, pa očekivat da ćeš jih nać kvartu i da će bit dosta za večeru. Jošćec bi bilo najboje da sami blušći, i sparoge, skačedu u saket! E, pa kal koga trefiš di se vraća iz gore doma s kiticon njih u ruci, koda su ciklame oli jubice, omar znaš da je to tutle koji pojma nema i koji je išća blušće uza kraj ol puta.

Kal smo nabrali saket vega zeja, ondac ćemo ga donit doma i iskrenut priko stola, pa ćemo pomnjivo kidat podanke, pazeć da ča višje zdravega blušća ostane za u teću. Oni tvrdi, žilavi dil bacit ćemo kunciman, a one vrhe stavit ćemo u posoljenu vrilu vodu da se kuhadu. Ne vaja da se raspadedu, a gotovi su kal se oni debji moredu izmeju kažiprsta i palca smečit. To će reć pe-šest minutih.

Iskuhane blušće i sparoge procidit ćemo u pašabrodu, iskrenut u kakovu terinu i pustit da se ohladidu. Kal dojdedu na temperamenat kakov je vanka, ondac su najboji za jist. A jošćec su boji kal se izvadidu iz frižidera. Začini jih se noliko koliko se misli tega puta izist (ako jih se je bilo nabralo vele), a no rešto vaja tornat nase u frižider. A začinit ćemo jih tako da jih pinku pospemo soljon i papron, ter oblijemo maslinovin ujen i kvasinon. Ko salatu.

Običaj je da se sa kuhanin blušćiman i sparogan jidu jaja utvrdo.

Vaša reakcija na temu
Pregledaj komentare