DALMATINSKA KUŽINA: Punjene lignje
Dalmatinska kužina Piše: Siniša Vuković

DALMATINSKA KUŽINA: Punjene lignje

'Maestrochef' Siniša Vuković piše o tradicionalnoj dalmatinskoj spizi

Ako si jema sriću da si sam na peškafondu iz kaića izvadi kojugod lignju, ondac će ukus u teći na kraju bit puno guštožiji, vengo kal si kupi lignje na paškariji, pa nis u stvari ni skroz-naskroz sigur ča si zapravo i kupi.

Lignjan ćemo najpri oldilit glavu ol tila. Ono droba ča je izašlo sa glavon lipo ćemo bacit kvragu, pa kažiprston izvadit ono ča je ostalo u tilu lignje. Izvadit ćemo i nu kost - hm: kost!? - mislin na oni najilon ča u evoluciji mekušcih glumi kičmu. Posli tega ćemo nožon okinut krilca ol liganj i isić ih na sitne komadiće. Isto ćemo učinit i s glavon sa kraciman, s tin da ćemo krake iskrižat na male prutiće, a glavu (bez očijuh i zub) na majušne koskice. Ovisno obo ten koliko smo dobili matrejala, i kugod cilu lignju ćemo narizat na komadiće, da jemamo čin punit one druge.

Kal smo to učinili, ondac ćemo usitno iskrižat dvi glavice luka i jedan stog petrusimula. Pa na maslinoven uju šufigat luk. Pa na luk dodat iskrižana krilca, krake i lignje i, kal malo posolimo, šufigavat ćemo nikih dva-tri minuta. Sal ćemo usut i petrusimul, pa ondac ulit malo bilega vina i sve to posut suhin mlivenin ruzmarinon. Neka se šufigaje nalagahno, dokle vino ne ižvampije. 

Pokle su se kraci išufigali, sa ton smjeson ćemo punit tubete od liganj. Kal smo svršili filovanje, ušće od lignje zakrakunat ćemo sa štikalenton: tako da uduplo ušijemo kako bismo ča boje ti grćan zatvorili, pazeć da se ne slomi štikalenat. Ako se slomi, jebi ga, ajde isponova!

U istu široku teću, u kon smo žutili, i zažutili, krake, luk i petrusimul, sal ćemo postivat nadivene lignje, pa ćemo jih zalit bilin vinon i pasaton ol pomidora. Posut ćemo sa jošćec suhih listov ol ruzmarina, papron i izmrvjenin peperončiniman. Vaja bit atento sa soljon, jerbo smo već pri bili solili. Poklopit ćemo teću i metnut na žeštoko, nakon čega ćemo smanjit i pustit da po ure tuntenja nalagahno. Ondac vaja maknut pokriv i ostavit da se šug reducira. Jošćec vada projde kvarat od ure i lignje ćedu bit gotove.

Ka prilog može lipo doć blitva oli brokuli s kuhanin kumpiron, oli sami kuhani kumpir, a gre uz to i kakova pašta oli ostinjena pulenta.

P. S.

Jema san čut da se u smjesu za punit lignje moredu metnut i rizi, oli prezla, oli smočena pupa ol kruha, koja se more stavit i u smjesu za punjene paprike. Ako će se ovode stavjat rizi, bilo bi jih lipo dopolak skuhat u slanon vodi oli pinku šufigat na maslinoven uju i, kal se uje rašuši, bilen vinu. Sa smjeson ol rizih ne bi tribalo do grla nadit lignje, da nan se ne prosededu kal rizi u njiman razbumbadu.

Vaša reakcija na temu
Pregledaj komentare