DALMATINSKA KUŽINA: Artičoki sa bobon, bižon, sparogan i pršuton

Osnovni uvjeti: 

artičoki, bob, biž, sparoge, pančeta, pršut,

pasata ol pomidora, voda ol sparog, jaja utvrdo

maslinovo uje, luk, petrusimul, prezla, kapula, prošek

bilo vino, slalka mlivena paprika, mravinac, sol, papar

Ovu manjativu mogli bismo nazvat 'vlaški artičoki', za razliku ol 'bodulskih' sa kongan i škanpan. 

Zato ćemo vazest lopižu, nu lipu teću ol pečene zemje, pa ćemo u nje, na lno, ulit maslinovega uja i na njemu šufigat kapulu iskrižanu na škaje. Ne vaja da kapula puno izgori, jurve neka samre, neka se zacakli. E, pa ondac u to vaja uvalit malo luka i petrusimula, bome sve usitno iskrižano, ter učinit dva đira drvenjačon, nakon čega ćemo šufig zalit sa pasaton ol pomidorih pa molat da tihula ispotiha doklen se ne učini lipa šaša. 

Za vrime te lagahne kuhanje mi ćemo u blenderu ispaštroćat dva jaja iskuhana utvrdo, po šake petrusimula i sedan-osan češjih luka, na velon zlici prezle, kugod koskicu pančete: sve to obliveno maslinovin ujen. Dobro to vaja istuć doklegod se ne učini u koda maltu. To će nan bit dosta za filovat jednu duzinu artičokih. A prin vengo ča jih budemo nadivali, ako su starikovi i ako jemadu badajike po vrsiman nih tustih listov, okinut ćemo na artičokiman te drače. Ako su mladikovi, ni potriba kidat ništa, jurve ćemo jih proprat kroz vodu. I onda napunit meju listoviman sa smjeson ča smo je učinili u blenderu.

Šaša se je jurve učinila, digod smo je bili promišali doklen smo nadivali artičoke, pa ćemo sadar u nje iskrenut na zlici mravinca i po jednu po kila mladega očišćenega boba i biža. Posut ćemo po ten na kućarinu slalke mlivene paprike, soli i papra. Dodat ćemo i kigod komad pančete i mesa kolo kosti ol pršuta (ča se ni moglo lipo nožon rizat na fete). Postivat ćemo u to i filovane artičoke, impijo, ulit u žmulu bilega vina i zalit do povrh artičokih sa juhon ku smo iskuhali ol tvrdih podancih ol sparog. I neka daje piruca ispotiha doklen bob i biž samo ča nisu gotovi. To će reć dobrih tri kvarta od ure, oli pinkicu boje, a ondac ćemo dodat i vrhe ol sparog iskrižane na jednu četiri centimetra, pa oblit sa po žmula prošeka. Kadikad ćemo protrest lopižon, ka ča smo protresali i do sada, pa kal se iskuhadu sparoge, sve je gotovo.