DALMATINSKA KUŽINA Torta hrapoćuša

Osnovni uvjeti: 

Torta: 1 jaje, 10 žumancih
11 zlic cukra, 11 zlic brašna
6 zlic masti, kora od limuna i naranče
1 prašak za pecivo, 2 vanilije, maraskino

Krema: 8 bilancih, po kila cukra
60 dek orihov, 2 vanilije, limun, maraskino

Starinska torta hrapoćuša, iz Dola na Braču, endemična je vrsta slalkega ča se ne čini ninder na drugen mistu, ni u kojen drugen mistu, bilo u Dalmaciji ili di – na drugen mistu. U Dolu jema vele orihov, a jema i jedna koda grota, mala spila pol brigon, a stinja u njon pari koda je od orihov učinjena: sva je, nako, koda od izmrvjene stinje napravjena, koda si orihe očisti pa š njiman obloži nebo ol spile i popodi njezin kleh… 

A va naša torta, rekli smo da se zove hrapoćuša, čini se na dva poda: dojni je rahli koda biskvit ol pečene smjese, a gornji je karamelizirana krema sa cilin orisiman ča se kasnije razlije po torti. Ol svih torat ča se činidu i pečedu, va je prava pravcata meštranca ol slalkega! 

Moća ispeć, ti, koda biskvit…

Najprvo ćemo u terinu iskrenut jedno cilo jaje i u nje dodat jošćec deset žumancih. Na svako žumance dodat ćemo jednu zlicu cukra, znači sve skupa jedanajest, i dvi vanilije. Ulit ćemo i deboto dec maraskina (oli rakije: ja san metnu gorčicu da mi se gušti nadopunjadu s orisiman), pa ćemo to lipo stat tuć sa mikseron. Svako toko dolit ćemo po jednu zlicu raskravjene masti, ukupno njih šest. Pokle nan se je cukar raskravi i pokle se je učinila lipa rilka koda malta, likadina, u nje ćemo dodat na gratakaži izgratanu koru ol jednega limuna i jedne naranče. Drvenjačon ćemo sadar to sve dobro izburtit, a ondac ćemo počet – vrteć ne pristajuć – dodavat jednu po jednu zlicu glalkega brašna, ukupno njih jedanajest, ka i cukra: na svako žumance po jednu zlicu. Vrtejat ćemo dokle nan se brašno posve ne umuti u tu, rekli smo, likadinu za tortu.

Pa ćemo ondac vazest jednu teću, oli kalup za torte, iznutra ćemo ga namašćat mašćon, lipo langvido, i isto tako langvido tu mast posut ćemo su pinkicu glalkega brašna. Ondac ćemo u ti kalup, oli teću, izlit vu lipu žutu likadinu ol svega skupa, ter ćemo metnut u pećicu ol špahera da se na 180 stupnjev temperamenta peče jednu tri kvarta od ure. Vaja bit atento, pa gledat biskvit, nako, da ne bi išlo naopako. 

Kal smo ocinili da je vi komad buduće torte pečen (to ćemo omirat naprama boji ku će ćapat), ubost ćemo ga štikadenton, za svaki slučaj, da bismo bili siguri kako je sve ispalo kako spada, a to će reć da je štikadenat suh. Neka torta stoji još pe-šest minutih u pećici kon su vrata otvorena dopolak, neka pinkicu oldahne, neka se uležaje, pa ćemo je ondac izvadit vanka, razarmat iz kalupa, i molat da se ohladi.

A dokle se torta hladi i stine, mi ćemo u drugon terini (u ku smo mećali bilanca dokle smo jih malopri oldvajali ol žumancih), istuć osan bilancih, po kila cukra, dvi vanilije, u bićerinu soka od limuna i dec maraskina oli rakije. Tuć ćemo to dokle nan ne dojde jedna rilka masa; nikako se nesmidu bilanca puno stvrdnut. Pa ćemo so tin na banja-mariju: u velu teću uzavrit ćemo vodu, a ondac ćemo manju teću metnut nada tu veliku, pa ćemo u ton manjon teći na pari stalno vrtejat istučeno bilance u ko smo iskrenuli 60 dek orihov u komadiman. Proć će i kvarat od ure da se to tako bari, dokle se smjesa bokun ne karamelizira, dokle malo ne požmari.

A pokle je pasalo toko vrimena, biskvit ol torte nan se je rashladi, navlaš ondac ako je bava ol bure, pa smo ga metnuli malo na balkon oli iznili pril kužinu pod barsu. Tako ostinutega, biskvit ćemo nakapat, pomočit ćemo ga sa malo manje ol deca maraskina oli rakije. E, sadar ćemo jopeta nada ostinjeni biskvit metnut ni isti kalup, pa ćemo u nje, a priko biskvita, izlit vu smjesu karameliziranega bilanca s orisiman. Lipo ćemo sve poravnat i rastrkat, pazeć da nan polovice orihov budu obrnute prama gori, kako bi tortu kašnje bilo lipje za vidit. Kal smo sve razmazali i postivali kako spada, ondac ćemo cilu tortu vratit nase u pećicu ol špahera, pa ćemo je jošćec malo peć na 190 stupnjev. Triba cilo vrime gledat u nje, jerbo neće pasat depju vrimena kal će ona jurve počet dobivat kafenkastu koricu. A kal se je to dogodilo, kal je hrapoćuša dobila lipu boju driva borovine oli ol česmine, ondac ćemo ugasit špaher, izvadit tortu vanka i pustit je da se ohladi.

Pokle je hrapoćuša ostinula, uvalit ćemo je skupa s kalupon u frižider, da se lipo stisne i stegne u se, nakon čega ćemo je izvadit vanka, rizat na fete i lipo jist.